ദുബായ്: കടുത്ത വേനൽക്കാലത്ത് സർക്കാർ ജീവനക്കാർക്ക് ആശ്വാസം നൽകുന്നതിനായി ദുബായ് ഗവൺമെൻ്റ് ഫ്ലെക്സിബിൾ ജോലി സമയം പ്രഖ്യാപിച്ചു. 2025 ജൂലൈ 1 മുതൽ സെപ്റ്റംബർ 12 വരെയാണ് ഈ താൽക്കാലിക ക്രമീകരണം നിലവിലുണ്ടാവുക. ഓരോ സർക്കാർ സ്ഥാപനത്തിൻ്റെയും വിവേചനാധികാരം അനുസരിച്ച് നടപ്പാക്കുന്ന ഈ പദ്ധതിയിലൂടെ, ഒരു വിഭാഗം ജീവനക്കാർക്ക് വെള്ളി, ശനി, ഞായർ ദിവസങ്ങളിൽ പൂർണമായ അവധി ലഭിക്കും.
ദുബായ് ഗവൺമെൻ്റ് ഹ്യൂമൻ റിസോഴ്‌സസ് ഡിപ്പാർട്ട്‌മെൻ്റ് (DGHR) പുറത്തിറക്കിയ അറിയിപ്പ് പ്രകാരം, ജീവനക്കാരെ രണ്ട് ഗ്രൂപ്പുകളായി തിരിക്കും. ആദ്യ ഗ്രൂപ്പിലുള്ളവർ തിങ്കൾ മുതൽ വ്യാഴം വരെ എട്ട് മണിക്കൂർ ജോലി ചെയ്യണം. ഇവർക്ക് വെള്ളി, ശനി, ഞായർ ദിവസങ്ങൾ പൂർണമായും അവധിയായിരിക്കും. രണ്ടാമത്തെ ഗ്രൂപ്പ് തിങ്കൾ മുതൽ വ്യാഴം വരെ ഏഴ് മണിക്കൂറും, വെള്ളിയാഴ്ച നാലര മണിക്കൂറും ജോലി ചെയ്യും. ഇത് നിലവിലെ സാധാരണ പ്രവൃത്തി സമയത്തിന് തുല്യമാണ്.
കഴിഞ്ഞ വർഷം 21 സർക്കാർ സ്ഥാപനങ്ങളിൽ ഈ പദ്ധതി പരീക്ഷണാടിസ്ഥാനത്തിൽ നടപ്പാക്കിയിരുന്നു. ഇത് ജീവനക്കാരുടെ ഉത്പാദനക്ഷമത വർധിപ്പിക്കുകയും മികച്ച തൊഴിൽ അന്തരീക്ഷം സൃഷ്ടിക്കുകയും ചെയ്തതായി കണ്ടെത്തി. സർവേയിൽ പങ്കെടുത്ത 98 ശതമാനം ജീവനക്കാരും ഈ ക്രമീകരണത്തിൽ സംതൃപ്തി രേഖപ്പെടുത്തിയിരുന്നു. ഈ വിജയത്തെ തുടർന്നാണ് പദ്ധതി വിപുലീകരിക്കുന്നത്.
ഇതോടൊപ്പം, വേനൽക്കാലത്ത് തൊഴിലാളികളുടെ സുരക്ഷ ഉറപ്പാക്കുന്നതിനായി യുഎഇയിൽ ഉച്ചവിശ്രമ നിയമം ജൂൺ 15 മുതൽ പ്രാബല്യത്തിൽ വന്നിട്ടുണ്ട്. സെപ്റ്റംബർ 15 വരെ നീളുന്ന നിയമപ്രകാരം, ദിവസവും ഉച്ചയ്ക്ക് 12:30 മുതൽ 3 മണി വരെ തുറന്ന സ്ഥലങ്ങളിൽ നേരിട്ട് സൂര്യപ്രകാശമേറ്റ് ജോലി ചെയ്യുന്നത് നിരോധിച്ചിരിക്കുന്നു. നിയമം ലംഘിക്കുന്ന കമ്പനികൾക്ക് ഓരോ തൊഴിലാളിക്കും 5,000 ദിർഹം വീതം പിഴ ചുമത്തും. നിയമലംഘനത്തിൽ ഒന്നിലധികം തൊഴിലാളികൾ ഉൾപ്പെട്ടാൽ പിഴ 50,000 ദിർഹം വരെയാകാം.
