ദോഹ: പശ്ചിമേഷ്യയിലെ ഇറാൻ - ഇസ്രയേൽ സംഘർഷത്തെത്തുടർന്ന് ഖത്തറിൽ കുടുങ്ങിപ്പോയ ഇന്ത്യൻ യാത്രക്കാർക്ക് ആശ്വാസവാർത്ത. കുടുങ്ങിക്കിടക്കുന്നവരെ നാട്ടിലെത്തിക്കുന്നതിനായി ഇന്ന് കൊച്ചി, മുംബൈ, ഡൽഹി എന്നിവിടങ്ങളിലേക്ക് പ്രത്യേക വിമാന സർവീസുകൾ നടത്തുമെന്ന് ഖത്തറിലെ ഇന്ത്യൻ എംബസി അറിയിച്ചു.
ട്രാൻസിറ്റ് വിസയിലും ഹ്രസ്വകാല വിസയിലും ദോഹയിലെത്തി യാത്ര തടസ്സപ്പെട്ട ആയിരത്തോളം ഇന്ത്യക്കാർ കഴിഞ്ഞ മൂന്ന് ദിവസത്തിനിടെ ഖത്തർ എയർവേസ് വഴി ഇതിനോടകം മടങ്ങിയതായും എംബസി വ്യക്തമാക്കി. കഴിഞ്ഞ ദിവസം ദോഹയിൽ നിന്ന് ഡൽഹിയിലേക്ക് നടത്തിയ സർവീസിൽ മുന്നൂറിലധികം പേർ ജന്മനാട്ടിലെത്തി.
യാത്രക്കാർ ശ്രദ്ധിക്കേണ്ട പ്രധാന കാര്യങ്ങൾ:
* വിമാന സർവീസുകൾ: ഇന്ന് കൊച്ചി, മുംബൈ, ഡൽഹി വിമാനത്താവളങ്ങളിലേക്ക് സർവീസുകൾ ലഭ്യമാകും.
* സൗദി വിസ: ഖത്തറിൽ കുടുങ്ങിപ്പോയവരിൽ സൗദി അറേബ്യയിലേക്ക് പോകേണ്ടവരുടെ വിസ അപേക്ഷാ കേസുകൾ എംബസി നേരിട്ട് ഏറ്റെടുക്കും.
* നിർദ്ദേശങ്ങൾ: ഖത്തർ ആഭ്യന്തര മന്ത്രാലയം നൽകുന്ന സുരക്ഷാ മാർഗനിർദ്ദേശങ്ങൾ യാത്രക്കാർ കർശനമായി പാലിക്കണം.
* വിവരങ്ങൾ: എയർലൈനുകളുമായും എംബസി അധികൃതരുമായും നിരന്തരം ബന്ധം പുലർത്തുക. വ്യാജ വാർത്തകൾ വിശ്വസിക്കാതെ ഔദ്യോഗിക സ്രോതസ്സുകളെ മാത്രം ആശ്രയിക്കുക.
യാത്രക്കാരുടെ സുരക്ഷയും സുഗമമായ മടക്കയാത്രയും ഉറപ്പാക്കാൻ ഖത്തർ അധികൃതരുമായി ചേർന്ന് പ്രവർത്തിക്കുകയാണെന്ന് ഇന്ത്യൻ എംബസി വക്താവ് അറിയിച്ചു.
