ദുബായ്: ഡെലിവറി റൈഡർമാർക്ക് സൗജന്യ ഭക്ഷണവും വിശ്രമസൗകര്യവും ഒരുക്കി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA). റൈഡർമാർ സമൂഹത്തിന് നൽകുന്ന സംഭാവനകൾ പരിഗണിച്ചും കടുത്ത വേനലിൽ അവരുടെ ക്ഷേമം ഉറപ്പാക്കുന്നതിനുമായാണ് ഈ പുതിയ പദ്ധതി.
യു.എ.ഇ ഫുഡ് ബാങ്ക്, പ്രമുഖ ഡെലിവറി പ്ലാറ്റ്ഫോമുകൾ എന്നിവയുമായി സഹകരിച്ചാണ് പദ്ധതി നടപ്പിലാക്കുന്നത്. എമിറേറ്റിലെ പ്രധാന ബസ്, മെട്രോ സ്റ്റേഷനുകളിൽ സജ്ജീകരിച്ചിട്ടുള്ള 23 താൽക്കാലിക വിശ്രമകേന്ദ്രങ്ങളിലൂടെയാണ് ഭക്ഷണം വിതരണം ചെയ്യുക.
* പ്രധാന കേന്ദ്രങ്ങൾ: ഗോൾഡ് സൂഖ്, സത്വ, അൽ ജാഫിലിയ, ഖുസൈസ്, കറാമ എന്നീ ബസ് സ്റ്റേഷനുകളിലും റാഷിദിയ, അൽ ഫുർജാൻ, ഡി.എം.സി.സി, ബർജുമാൻ, ഇബ്നു ബത്തൂത്ത തുടങ്ങിയ മെട്രോ സ്റ്റേഷനുകളിലും സൗകര്യം ലഭ്യമാണ്.
* ഉദ്ദേശ്യം: കഠിനമായ വേനൽക്കാലത്ത് റൈഡർമാർക്ക് ആശ്വാസം നൽകുന്നതിനൊപ്പം, ജൂൺ 15 മുതൽ സെപ്റ്റംബർ 15 വരെ നടപ്പിലാക്കുന്ന ഉച്ചവിശ്രമ (മിഡ് ഡേ ബ്രേക്ക്) നിയമത്തിന് പിന്തുണ നൽകുക കൂടിയാണ് ലക്ഷ്യം.
ഡെലിവറി തൊഴിലാളികൾ രാജ്യത്തിന്റെ സാമ്പത്തിക, സാമൂഹിക ഘടനയിലെ അനിവാര്യ ഘടകമാണെന്ന് പദ്ധതിയെക്കുറിച്ച് സംസാരിച്ച യു.എ.ഇ ഫുഡ് ബാങ്ക് എക്സിക്യൂട്ടീവ് ടീം മേധാവി മനൽ ഒബൈദ് ബിൻ യാറൂഫ് വ്യക്തമാക്കി.
