ദോഹ: ഗൾഫ് മേഖലയിലെ വ്യോമഗതാഗത തടസ്സങ്ങൾക്ക് പരിഹാരമായതിനെ തുടർന്ന് ഖത്തർ എയർവേയ്സ് താൽക്കാലികമായി നിർത്തിവെച്ചിരുന്ന സർവീസുകൾ പുനരാരംഭിച്ചു. ബഹ്റൈൻ, കുവൈത്ത് തുടങ്ങിയ പ്രധാന റൂട്ടുകളിലേക്കുള്ള വിമാന സർവീസുകൾ പൂർണ്ണമായും സാധാരണ നിലയിലായതായി കമ്പനി അധികൃതർ അറിയിച്ചു.
സാങ്കേതിക തടസ്സങ്ങളും മോശം കാലാവസ്ഥയും കാരണം നിർത്തിവെച്ചിരുന്ന സർവീസുകളാണ് മേഖലയിലെ സ്ഥിതിഗതികൾ സാധാരണ നിലയിലായതോടെ പുനരാരംഭിച്ചത്. ടിക്കറ്റ് ബുക്ക് ചെയ്ത യാത്രക്കാർ വിമാനത്താവളത്തിലേക്ക് തിരിക്കും മുൻപ് അതത് സർവീസുകളുടെ തത്സമയ വിവരങ്ങൾ ഖത്തർ എയർവേയ്സിന്റെ ഔദ്യോഗിക വെബ്സൈറ്റ് വഴി പരിശോധിക്കണമെന്ന് അധികൃതർ അഭ്യർത്ഥിച്ചു.
ഗൾഫ് മേഖലയിലെ മറ്റ് രാജ്യങ്ങളിലേക്കുള്ള സർവീസുകളും വരും ദിവസങ്ങളിൽ പൂർണ്ണ തോതിൽ സമയബന്ധിതമായി സർവീസ് നടത്തുമെന്നും കമ്പനി വക്താവ് അറിയിച്ചു. സർവീസുകൾ പുനരാരംഭിച്ചത് ആയിരക്കണക്കിന് പ്രവാസി യാത്രക്കാർക്ക് വലിയ ആശ്വാസമായിട്ടുണ്ട്.
