ദുബായ്: യുഎഇയില്‍ പുകവലിക്കെതിരെയുള്ള നിയന്ത്രണങ്ങള്‍ കർശനമാക്കുന്നു. കുട്ടികളുടെ സാന്നിദ്ധ്യത്തില്‍ പുകവലിച്ചാല്‍ 5000 ദിർഹം (1.19 ലക്ഷത്താേളം രൂപ) പിഴ ചുമത്താനാണ് നീക്കം.
ഈ നിയമം കർശനമായി നടപ്പാക്കാൻ അധികൃതർ തീരുമാനിച്ചിട്ടുണ്ട്. ഇതിനൊപ്പം കുട്ടികള്‍ക്ക് പുകയില ഉല്‍പ്പന്നങ്ങള്‍ വില്‍ക്കുകയോ വില്‍ക്കാൻ ശ്രമിക്കുകയോ ചെയ്താല്‍ മൂന്നു മാസം തടവും നാലു ലക്ഷത്തോളം രൂപ പിഴയും ലഭിക്കും.
മദ്യമോ ആരോഗ്യത്തിന് അപകടമുണ്ടാക്കുന്ന വസ്തുക്കളോ കുട്ടികള്‍ക്ക് വില്‍ക്കുന്നതിനും ഈ ശിക്ഷ ബാധകമായിരിക്കും.
കുട്ടികളുടെ അവകാശ സംരക്ഷണ നിയമപ്രകാരമാണിത്.
ഷോപ്പിംഗ് മാളുകളില്‍ പരസ്യമായി ഇ- സിഗരറ്റ് ഉപയോഗിക്കുവർക്കെതിരെയും കർശന നടപടിയുണ്ടാകും. ഇത്തരക്കാരെ പിടികൂടാനായി പ്രത്യേക പരിശോധനയും നടത്തുന്നുണ്ട്.
മാളുകളില്‍ പുകവലിക്കാനായി പ്രത്യേക സ്ഥലങ്ങളുണ്ടെങ്കിലും പലരും പൊതു സ്ഥലങ്ങളിലാണ് പുകവലിക്കുന്നത്. ഇതു സംബന്ധിച്ച്‌ പരാതികള്‍ ഏറിയതോടെയാണ് നടപടി കർശനമാക്കിയത്.
പുകവലി നിരോധനം സംബന്ധിച്ച്‌ പൊതു ഇടങ്ങളില്‍ മുന്നറിയിപ്പ് സ്ഥാപിച്ചിട്ടുണ്ടെങ്കിലും അതൊന്നും പലരും കാര്യമാക്കുന്നില്ല. പാർക്കുകളിലും ബീച്ചുകളിലും മറ്റ് പാെതുവിനോദ കേന്ദ്രങ്ങളിലും പുകവലിക്ക് കർശനമായ വിലക്കുണ്ട്.
ഇ- സിഗരറ്റുകളും അതിലുപയോഗിക്കുന്ന രാസവസ്തുക്കളും നിയമപരമായാണ് യുഎഇയില്‍ വില്‍ക്കുന്നത്. എന്നാല്‍ നിശ്ചിത പ്രദേശങ്ങളില്‍ മാത്രമേ ഇവ ഉപയോഗിക്കാൻ അനുമതിയുള്ളൂ.
താമസയിടങ്ങള്‍, വിദ്യാലയങ്ങള്‍, ആരാധനാലയങ്ങള്‍ എന്നിവയുടെ 150 മീറ്റർ പരിധിയില്‍ ഇവ ഉപയോഗിക്കാൻ അനുമതിയില്ല. ഈ നിയമം ലംഘിക്കുന്നവർക്കെതിരെ കർശന നടപടി സ്വീകരിക്കാനാണ് അധികൃതർ ഒരുങ്ങുന്നത്.
