റിയാദ്: പെട്ടെന്ന് അനാവശ്യമായി ബ്രേക്ക് ഇടുന്നവർക്ക് മുന്നറിയിപ്പുമായി സഊദി മുറൂർ. പെട്ടെന്ന് അനാവശ്യമായി ബ്രേക്ക് ഉപയോഗിക്കുന്നത് നിയമപ്രകാരം ശിക്ഷാർഹമായ ഗതാഗത ലംഘനമാണെന്ന് സഊദി ട്രാഫിക് ഡയറക്‌ടറേറ്റ് വ്യക്തമാക്കി. ഇതിനു കടുത്ത പിഴയും ഈടാക്കുമെന്നും മുന്നറിയിപ്പിലുണ്ട്.
പെട്ടെന്ന് വാഹനം നിർത്തുന്നത് റോഡ് ഉപയോക്താക്കളുടെ സുരക്ഷയെ അപകടത്തിലാക്കുമെന്ന് ട്രാഫിക് വിഭാഗം അറിയിച്ചു. ഇത് അപകടങ്ങൾക്ക് കാരണമായേക്കാവുന്ന സുരക്ഷിതമല്ലാത്ത പെരുമാറ്റമാണെന്നും ട്രാഫിക് മുന്നറിയിപ്പ് നൽകി.
ഈ നിയമ ലംഘനത്തിന് 300 റിയാൽ മുതൽ 500 റിയാൽ വരെ പിഴ ലഭിക്കുമെന്ന് സഊദി ട്രാഫിക് ഡയറക്‌ടറേറ്റ് മുന്നറിയിപ്പിൽ വ്യക്തമാക്കി.
