ദുബായ്: പൊതുസ്ഥലം വൃത്തികേടാക്കുന്നവരെ പിടികൂടാൻ പുതിയ മൊബൈല്‍ ആപ്ലിക്കേഷൻ പുറത്തിറക്കി ദുബായ് മുനിസിപ്പാലിറ്റി.
പൊതുസ്ഥലത്ത് തുപ്പുകയോ, മാലിന്യം വലിച്ചെറിയുകയോ ചെയ്യുന്നവർക്ക് തത്സമയം പിഴ നല്‍കുന്ന സംവിധാനമാണിത്.
ലോകത്തിലെ ഏറ്റവും വൃത്തിയുള്ള നഗരങ്ങളിലൊന്നാണ് ദുബായ്. ആ പെരുമക്ക് കോട്ടം തട്ടാതിരിക്കാനാണ് ദുബായ് നഗരസഭയിലെ തെരഞ്ഞെടുക്കപ്പെട്ട ഉദ്യോഗസ്ഥർക്കായി ഇല്‍ത്തിസാം എന്ന പേരില്‍ പുതിയ മൊബൈല്‍ ആപ്ലിക്കേഷൻ പുറത്തിറക്കിയിരിക്കുന്നത്.
ജുഡീഷ്യല്‍ അധികാരമുള്ള ഉദ്യോഗസ്ഥരായിരിക്കും ഈ മൊബൈല്‍ ആപ്ലിക്കേഷനുമായി നഗരത്തിന്റെ വിവിധ ഭാഗങ്ങളിലുണ്ടാവുക.
മാലിന്യം വലിച്ചെറിയുക, അനുവാദമില്ലാത്ത സ്ഥലത്ത് ബാർബിക്യൂ പാകം ചെയ്യുക, അനധികൃത പരസ്യങ്ങള്‍ പതിക്കുക, അനുവാദമില്ലാത്ത സ്ഥലത്ത് നിർത്തി കാർ കഴുകുക, വളർത്തു മൃഗങ്ങളുടെ വിസർജ്യങ്ങള്‍ പൊതുസ്ഥലത്ത് നിന്ന് മാറ്റാതിരിക്കുക തുടങ്ങി എട്ട് തരം നിയമ ലംഘനങ്ങള്‍ നടത്തിയാല്‍ ഉടൻ പിഴ ലഭിച്ചതിന്റെ സന്ദേശം എസ്‌എംഎസായി മൊബൈലിലെത്തും.
വാഹനമോ, തിരിച്ചറിയല്‍ രേഖകളോ ഫോട്ടോയെടുത്ത് നിയലംഘകരെ തിരിച്ചറിയാനും അവരുടെ പേരില്‍ പിഴയിടാനുമുള്ള സംവിധാനം ഇല്‍ത്തിസാം എന്ന ആപ്പില്‍ ഒരുക്കിയിട്ടുണ്ട്.
ദുബായില്‍ പൊതുസ്ഥലത്ത് പാലിക്കേണ്ട നിയമങ്ങള്‍ അറിയാതെ ലംഘിച്ചാല്‍ പോലും വിവരമറിയും എന്ന കാര്യം ഉറപ്പാണ്.
