ഖത്തർ: ഖത്തറിലെ ഇന്ത്യൻ പ്രവാസികള്‍ക്ക് പാസ്‌പോർട്ട് ഫോട്ടോ സംബന്ധിച്ച്‌ ദോഹയിലെ ഇന്ത്യൻ എംബസി പുതിയ മാർഗ്ഗ നിർദ്ദേശങ്ങള്‍ പുറത്തിറക്കി.
പാസ്‌പോർട്ട് പുതുക്കുമ്പോഴോ പുതിയ പാസ്‌പോർട്ടിന് അപേക്ഷിക്കുമ്പോഴോ എല്ലാ അപേക്ഷകരും ഐ.സി.എ.ഒ (ICAO) മാനദണ്ഡങ്ങള്‍ക്കനുസരിച്ചുള്ള ഫോട്ടോ നിർബന്ധമായും അപ്‌ലോഡ് ചെയ്യണമെന്ന് ഇന്ത്യൻ വിദേശകാര്യ മന്ത്രാലയം നിർബന്ധമാക്കിയിട്ടുണ്ടെന്ന് എംബസി അറിയിച്ചു.
ഫോട്ടോയുടെ 80-85 ശതമാനം മുഖം ഉള്‍ക്കൊള്ളുന്ന രീതിയിലായിരിക്കണം ചിത്രം എടുക്കേണ്ടത്. തലയുടെയും തോളുകളുടെ മുകള്‍ ഭാഗത്തിന്റെയും ക്ലോസ് അപ്പ് ആണ് വേണ്ടത്. കളർ ഫോട്ടോയുടെ ഡയമെൻഷൻ 630*810 പിക്സലുകള്‍ ആയിരിക്കണം.
കമ്പ്യൂട്ടർ സോഫ്റ്റ്‌വെയർ ഉപയോഗിച്ച്‌ മാറ്റം വരുത്തിയ ചിത്രങ്ങള്‍ അനുവദനീയമല്ല. ഫോട്ടോയുടെ പശ്ചാത്തലം വെളുത്ത നിറമായിരിക്കണം.
അപേക്ഷകൻ നേരിട്ട് ക്യാമറയിലേക്ക് നോക്കുന്ന രീതിയിലായിരിക്കണം ഫോട്ടോ. ചർമ്മത്തിന്റെ നിറം സ്വാഭാവികമായിരിക്കണം, കൂടാതെ ഉചിതമായ തെളിച്ചവും കോണ്‍ട്രാസ്റ്റും ഉറപ്പാക്കണം. കണ്ണുകള്‍ തുറന്നതും വ്യക്തമായി കാണാവുന്നതും ആകണം, കണ്ണിന് കുറുകെ മുടി വരാനോ വായ തുറന്നിരിക്കാനോ പാടില്ല.
ഏകീകൃത വെളിച്ചത്തില്‍ എടുക്കുന്ന ഫോട്ടോയില്‍ മുഖത്ത് നിഴലുകളോ ഫ്ലാഷ് റിഫ്ലക്ഷനുകളോ ഉണ്ടാകരുത്. ഫോട്ടോ മങ്ങിയത് ആകരുത്, ക്യാമറയില്‍ നിന്ന് 1.5 മീറ്റർ അകലെ നിന്നാണ് ചിത്രം എടുക്കേണ്ടത്.
മതപരമായ കാരണങ്ങളല്ലാതെ ശിരോവസ്ത്രങ്ങള്‍ അനുവദനീയമല്ല. അത്തരം സന്ദർഭങ്ങളില്‍, താടിയുടെ അടിഭാഗം മുതല്‍ നെറ്റിയുടെ മുകള്‍ ഭാഗം വരെയുള്ള മുഖ ഭാഗം പൂർണ്ണമായും വ്യക്തമായി കാണിക്കണം.
ഫോട്ടോയില്‍ തല ഭാഗം പൂർണ്ണമായും ഉള്‍ക്കൊള്ളണം, കൂടാതെ മുഖത്തെ ഭാവം സ്വാഭാവികമായിരിക്കണം. പാസ്‌പോർട്ട് അപേക്ഷകർ ഐ.സി.എ.ഒ. മാനദണ്ഡങ്ങള്‍ കൃത്യമായി പാലിക്കണമെന്ന് എംബസി നിർദ്ദേശിച്ചു.
