ജിദ്ദ : സൗദിയിൽ പെട്രോൾ ബങ്കുകളിൽ എൻജിൻ ഓഫാക്കാത്തവർക്കും ശരിയായ ട്രാക്ക് പാലിക്കാത്തവർക്കും ഇന്ധനം നൽകുന്നത് ഊർജ മന്ത്രാലയം വിലക്കി. പെട്രോൾ ബങ്കുകളിൽ നിശ്ചിത ക്യൂ ലെയ്നുകൾ പാലിക്കാത്ത ഉപഭോക്താക്കളുടെ വാഹനങ്ങളിൽ ഇന്ധനം നിറക്കുന്നത് നിരോധിച്ചുകൊണ്ട് ഊർജ മന്ത്രാലയം നിർദേശം പുറപ്പെടുവിച്ചു. ഇന്ധനം നിറക്കുന്ന സമയത്ത് വാഹന എൻജിനുകൾ ഓഫ് ചെയ്യാത്ത ഉപഭോക്താക്കൾക്ക് ഇന്ധനം നൽകരുതെന്നും പെട്രോൾ ബങ്കുകളുടെയും സർവീസ് സെന്ററുകളുടെയും മാനേജ്മെന്റുകൾക്കും പെട്രോൾ ബങ്കുകൾ പ്രവർത്തിപ്പിക്കുന്നതിന്റെയും അറ്റകുറ്റപ്പണികൾ നടത്തുന്നതിന്റെയും കരാറുകളേറ്റെടുത്ത കമ്പനികൾക്കും അയച്ച സർക്കുലറിൽ മന്ത്രാലയം കർശന നിർദേശം നൽകി. പെട്രോൾ ബങ്കുകളിൽ വാഹന ഗതാഗതം നിയന്ത്രിക്കാനുള്ള ശ്രമങ്ങളുടെ ഭാഗമായി, സുരക്ഷ വർധിപ്പിക്കാനും ഉപഭോക്ത്യ അനുഭവം മെച്ചപ്പെടുത്താനും സുഗമമായ സേവനം ഉറപ്പാക്കാനും നിയമലംഘനങ്ങൾ തടയാനും ഈ തീരുമാനത്തിലൂടെ ലക്ഷ്യമിടുന്നതായി മന്ത്രാലയം വ്യക്തമാക്കി.
