ജിദ്ദ: സൗദി അറേബ്യയിൽ തൊഴിൽ നിയമലംഘനങ്ങൾക്കുള്ള പിഴകൾ പരിഷ്കരിച്ച് മാനവവിഭവശേഷി, സാമൂഹിക വികസന മന്ത്രി അഹ്മദ് അൽറാജ്ഹി ഉത്തരവിട്ടു. തൊഴിൽ വിപണിയിലെ സുസ്ഥിരത ഉറപ്പാക്കാനും തൊഴിലാളികളുടെ അവകാശങ്ങൾ സംരക്ഷിക്കാനും ലക്ഷ്യമിട്ടാണ് പുതിയ നടപടി. 2025 ഫെബ്രുവരിയിൽ പുറപ്പെടുവിച്ച റോയൽ ഡിക്രിയുടെയും ഓഗസ്റ്റിലെ മന്ത്രിതല തീരുമാനത്തിന്റെയും തുടർച്ചയായാണ് ഈ ഭേദഗതികൾ നടപ്പിലാക്കുന്നത്.
പുതിയ പിഴകൾ ഒറ്റനോട്ടത്തിൽ:
* കരാർ ലംഘനം: അംഗീകൃത നിയമപ്രകാരം ജീവനക്കാരുടെ വിവരങ്ങൾ അപ്ഡേറ്റ് ചെയ്യാതിരിക്കുകയോ തൊഴിൽ കരാറുകൾ കൃത്യമായി രേഖപ്പെടുത്താതിരിക്കുകയോ ചെയ്താൽ 10,000 റിയാൽ വരെ പിഴ ഈടാക്കും.
* രജിസ്ട്രേഷൻ ഇല്ലാത്ത ജോലി: രേഖാമൂലമുള്ള കരാറില്ലാതെയും ഇലക്ട്രോണിക് സംവിധാനങ്ങളിൽ രജിസ്റ്റർ ചെയ്യാതെയും ജോലിക്ക് വെക്കുന്ന ഓരോ തൊഴിലാളിക്കും 5,000 റിയാൽ വീതം പിഴ ചുമത്തും.
* ജോലി സമയവും സുരക്ഷയും: ജോലി സമയം, പ്രതിവാര അവധി എന്നിവ ലംഘിക്കുന്നതിനും സുരക്ഷാ സംവിധാനങ്ങളില്ലാതെ അപകടകരമായ ജോലികളിൽ ഏർപ്പെടുത്തുന്നതിനും 20,000 റിയാൽ വരെയാണ് പിഴ.
* ലൈസൻസില്ലാത്ത റിക്രൂട്ട്മെന്റ്: ആവശ്യമായ ലൈസൻസില്ലാതെ റിക്രൂട്ട്മെന്റ്, തൊഴിലാളി കൈമാറ്റം എന്നിവ നടത്തുന്ന സ്ഥാപനങ്ങൾക്ക് 25,000 റിയാൽ വരെ പിഴ ലഭിക്കും.
* പരസ്യങ്ങളിലെ കൃത്രിമം: ഗാർഹിക തൊഴിലാളികളുമായി ബന്ധപ്പെട്ട പരസ്യങ്ങളിൽ തെറ്റായ വിവരങ്ങൾ നൽകിയാൽ 15,000 റിയാൽ വരെ പിഴ നൽകേണ്ടി വരും.
പ്രത്യേക തരംതിരിക്കൽ:
സ്ഥാപനങ്ങളുടെ പ്രവർത്തന മേഖലയുടെ സ്വഭാവമനുസരിച്ച് നിയമലംഘനങ്ങളെ മന്ത്രാലയം പ്രത്യേകം തരംതിരിച്ചിട്ടുണ്ട്. ഖനികൾ, ക്വാറികൾ, റിക്രൂട്ട്മെന്റ് ഏജൻസികൾ, ഗാർഹിക തൊഴിലാളികൾ, കാർഷിക മേഖല എന്നിങ്ങനെ ഓരോ വിഭാഗത്തിനും പ്രത്യേക പിഴകളും വ്യവസ്ഥകളും ബാധകമായിരിക്കും.
ആവർത്തിച്ചുള്ള നിയമലംഘനങ്ങൾ നടത്തുന്ന സ്ഥാപനങ്ങൾക്ക് പിഴ ഇരട്ടിയാക്കാനും പ്രവർത്തനങ്ങൾ താൽക്കാലികമായി നിരോധിക്കാനും പുതിയ ഭേദഗതിയിൽ വ്യവസ്ഥയുണ്ട്. പബ്ലിക് കൺസൾട്ടേഷൻ പ്ലാറ്റ്ഫോം വഴി പൊതുജനങ്ങളിൽ നിന്നും പങ്കാളികളിൽ നിന്നും അഭിപ്രായങ്ങൾ സ്വീകരിച്ച ശേഷമാണ് മന്ത്രാലയം ഈ ഭേദഗതികൾക്ക് അന്തിമരൂപം നൽകിയത്
