കുവൈത്ത് സിറ്റി: കുവൈത്തിലെ ജാബ്രിയയില് ശനിയാഴ്ച വൈകുന്നേരം മൂന്നുനില പാർപ്പിട സമുച്ചയത്തിന്റെ മേല്ക്കൂരയുടെ ഒരു ഭാഗം തകർന്നു വീണുണ്ടായ വലിയ അപകടത്തില് നിന്ന് നാലുപേർ അത്ഭുതകരമായി രക്ഷപ്പെട്ടു.
കെട്ടിടാവശിഷ്ടങ്ങള്ക്കിടയില് കുടുങ്ങിപ്പോയ ഇവരെ അതിസാഹസികമായാണ് അഗ്നിശമന സേനാംഗങ്ങള് പുറത്തെത്തിച്ചത്.
അപകടത്തെക്കുറിച്ചുള്ള വിവരമറിഞ്ഞയുടൻ ഹവല്ലി, സാല്മിയ ഫയർ സ്റ്റേഷനുകളില് നിന്നുള്ള പ്രത്യേക രക്ഷാപ്രവർത്തക സംഘം സംഭവസ്ഥലത്തേക്ക് എത്തുകയും രക്ഷാപ്രവർത്തനം നടത്തുകയുമായിരുന്നു.
കെട്ടിടത്തില് കുടുങ്ങിക്കിടന്നവരെ സുരക്ഷിതമായി പുറത്തെത്തിച്ച ശേഷം, മുൻകരുതലിന്റെ ഭാഗമായി താമസക്കാരെ മുഴുവൻ ഒഴിപ്പിച്ച് ഉദ്യോഗസ്ഥർ കെട്ടിടം പൂർണ്ണമായും സുരക്ഷിതമാക്കി. അപകടത്തില് ആർക്കും ഗുരുതരമായ പരിക്കുകളില്ലെന്ന് ഫയർ ഫോഴ്സ് അധികൃതർ സ്ഥിരീകരിച്ചിട്ടുണ്ട്.
മേല്ക്കൂര തകരാൻ ഇടയാക്കിയ സാങ്കേതിക കാരണങ്ങളെക്കുറിച്ച് വിശദമായ അന്വേഷണം നടത്തുന്നതിനായി അപകടസ്ഥലം പിന്നീട് ബന്ധപ്പെട്ട മറ്റ് സർക്കാർ വകുപ്പുകള്ക്ക് കൈമാറി. വലിയൊരു ദുരന്ത ഒഴിവാക്കാൻ കഴിഞ്ഞതിന്റെ ആശ്വാസത്തിലാണ് പ്രദേശവാസികള്.
