ദുബായ്: ഷെയ്ഖ് സായിദ് റോഡിലെ ഏറ്റവും പ്രശസ്തമായ ലാൻഡ്മാർക്കുകളിലൊന്നായ 'ടൊയോട്ട ബിൽഡിംഗ്' (നാസർ റഷീദ് ലൂത്ത കെട്ടിടം) പൊളിച്ചുമാറ്റുന്നു. കെട്ടിടത്തിന് അറ്റകുറ്റപ്പണികൾ നടത്താൻ ദുബായ് മുൻസിപ്പാലിറ്റി അനുമതി നൽകാത്തതിനെ തുടർന്നാണ് നിർമ്മിതി പൊളിച്ചുനീക്കാൻ തീരുമാനിച്ചത്.
1974-ൽ നിർമ്മിച്ച 15 നിലകളുള്ള ഈ റെസിഡൻഷ്യൽ കെട്ടിടത്തിന് മുകളിൽ 1981-ലാണ് വലിയ ചുവന്ന ടൊയോട്ട പരസ്യബോർഡ് സ്ഥാപിച്ചത്. ഇതോടെയാണ് കെട്ടിടത്തിന് 'ടൊയോട്ട ബിൽഡിംഗ്' എന്ന പേര് ലഭിച്ചത്. ഷെയ്ഖ് സായിദ് റോഡിന്റെ തുടക്കകാലത്തെ നിർമ്മിതികളിൽ ഒന്നായ ഈ കെട്ടിടം ദുബായുടെ നഗരവികസന ചരിത്രത്തിലെ പ്രമുഖ അടയാളമാണ്.
കെട്ടിടത്തിൽ നിയമവിരുദ്ധമായി മുറികൾ തിരിച്ച് അനധികൃതമായി നിരവധിയാളുകൾ താമസിച്ചതിനെ തുടർന്ന് അധികൃതർ വൈദ്യുതി ബന്ധം വിച്ഛേദിച്ചിരുന്നു. നിലവിൽ ഭൂരിഭാഗം താമസക്കാരെയും ഒഴിപ്പിച്ചിട്ടുണ്ടെന്നും കെട്ടിടം ഉടൻ പൂർണ്ണമായും ഒഴിപ്പിക്കുമെന്നും മാനേജ്മെന്റ് അറിയിച്ചു.
