മസ്കത്ത്: ഒമാനിലെ അൽ ഹെയിലിൽ ക്രിക്കറ്റ് മത്സരത്തിനിടെ പ്രവാസി മലയാളി കുഴഞ്ഞുവീണ് മരിച്ചു. ആലപ്പുഴ തുറവൂർ സ്വദേശി ഷബീർ ബഷീർ (35) ആണ് വെള്ളിയാഴ്ച രാവിലെ നടന്ന മത്സരത്തിനിടെ മരണപ്പെട്ടത്.
ജിഫ്നൈൻ ചലഞ്ചേഴ്സ് ടീമിന്റെ ക്യാപ്റ്റനായിരുന്ന ഷബീർ, കളിക്കളത്തിൽ വെച്ച് പെട്ടെന്ന് ശാരീരിക അസ്വസ്ഥത അനുഭവപ്പെട്ട് കുഴഞ്ഞുവീഴുകയായിരുന്നു. ഉടൻ തന്നെ സമീപത്തെ ആശുപത്രിയിലെത്തിച്ച് അടിയന്തര ചികിത്സയും സി.പി.ആറും നൽകിയെങ്കിലും ജീവൻ രക്ഷിക്കാനായില്ല.
കഴിഞ്ഞ 14 വർഷമായി ഒമാനിൽ ജോലി ചെയ്തുവരികയായിരുന്ന ഷബീർ, 'ഇലക്ട്രോമാൻ എൽ.എൽ.സി'യിലെ ജീവനക്കാരനായിരുന്നു. ഭാര്യയും മകനും അടങ്ങുന്ന കുടുംബം അദ്ദേഹത്തോടൊപ്പം മസ്കത്തിലാണുള്ളത്. മൃതദേഹം നാട്ടിലെത്തിക്കുന്നതിനുള്ള നടപടികൾ പുരോഗമിച്ചുവരുന്നതായി ബന്ധപ്പെട്ടവർ അറിയിച്ചു.
