ദമ്മാം: സൗദി അറേബ്യയിലെ ദമ്മാം വിമാനത്താവളത്തെ ലക്ഷ്യമിട്ട് യെമനിലെ ഹൂതി വിമതർ നടത്തിയ വ്യോമാക്രമണത്തിൽ ഒരാൾ കൊല്ലപ്പെട്ടു. എട്ട് പേർക്ക് പരിക്കേറ്റതായും വിമാനത്താവളത്തിന് നാശനഷ്ടങ്ങൾ സംഭവിച്ചതായും ജനറൽ അതോറിറ്റി ഓഫ് സിവിൽ ഏവിയേഷൻ അറിയിച്ചു. കൊല്ലപ്പെട്ട വ്യക്തി പ്രവാസിയാണെന്നാണ് ഔദ്യോഗിക വിവരം. പരിക്കേറ്റവരെ ഉടൻ തന്നെ അടുത്തുള്ള ആശുപത്രിയിലേക്ക് മാറ്റി. ആക്രമണം പ്രതിരോധിക്കുന്നതിനിടയിലാണ് അപകടമുണ്ടായത്.
ഇതിനുപുറമേ, ഷൈബ എണ്ണപ്പാടം ലക്ഷ്യമിട്ടുണ്ടായ ഹൂതി ആക്രമണത്തിൽ ഫിലിപ്പൈൻസ്, നേപ്പാൾ സ്വദേശികളായ രണ്ട് പേർ കൊല്ലപ്പെട്ടിരുന്നു. ഈ ആക്രമണത്തിൽ ഒരു ഇന്ത്യക്കാരനും പാകിസ്താൻ സ്വദേശിക്കും പരിക്കേറ്റിട്ടുമുണ്ട്. സൗദി സഖ്യസേനയുടെ പ്രതിരോധ പ്രവർത്തനങ്ങൾക്കിടയിൽ പതിച്ച മിസൈൽ-ഡ്രോൺ അവശിഷ്ടങ്ങളാണ് ആളപായത്തിന് ഇടയാക്കിയത്.
ഒക്ടോബർ 8, 10 തീയതികളിൽ റിയാദ് വിമാനത്താവളത്തിന് നേരെയും ഹൂതികളുടെ ഭാഗത്തുനിന്ന് ആക്രമണങ്ങൾ ഉണ്ടായിരുന്നു. ഈ ആക്രമണങ്ങളിൽ നിരവധി പേർ കൊല്ലപ്പെടുകയും റിയാദ് വിമാനത്താവളത്തിന്റെ പ്രവർത്തനം സ്തംഭിക്കുകയും ചെയ്തിരുന്നു. ഇതിന്റെ പശ്ചാത്തലത്തിലാണ് ഇപ്പോൾ ദമ്മാം വിമാനത്താവളം ലക്ഷ്യമിട്ടുള്ള പുതിയ ആക്രമണങ്ങൾ.
