അബുദാബി: മുഴുവൻ തൊഴിലാളികൾക്കും മലയാളികളായ പ്രവാസികള്‍ക്കുള്‍പ്പെടെ ആശ്വാസകരമായ വിധിയുമായി അബുദാബി കോടതി. ജീവനക്കാരന് മുഴുവൻ അവധിക്കാല വേതനവും ലഭിക്കാൻ അർഹതയുണ്ടെന്നാണ് കോടതി വിധിച്ചിരിക്കുന്നത്.
2018 ജനുവരി നാല് മുതല്‍ 2024 ജൂണ്‍ 30 വരെയാണ് ഹ‌ർജിക്കാരി സ്ഥാപനത്തില്‍ ജോലി ചെയ്തത്.
അടിസ്ഥാന ശമ്പളം 36,000 ദിർഹവും ലാഭ വിഹിതം ഉള്‍പ്പെടെ ആകെ ശമ്പളം 60,000 ദിർഹവും ആയിരുന്നു. ജോലി അവസാനിപ്പിച്ചതിന് പിന്നാലെ നിരവധി ആവശ്യങ്ങളുമായി യുവതി കേസ് ഫയല്‍ ചെയ്യുകയായിരുന്നു.
മുൻ തൊഴിലുടമ ഒരു യുവതിക്ക് 4,34,884 ദിർഹം (1,04,39,955.77 രൂപ) നല്‍കാൻ ഉത്തരവിട്ടു കൊണ്ടാണ് കോടതിയുടെ നിർണായക ഉത്തരവ്. ജോലിയുടെ മുഴുവൻ കാലയളവിലും പൂർണ അവധിക്കാല വേതനത്തിനുള്ള അവകാശം തൊഴിലാളിക്കുണ്ടെന്നും കോടതി വ്യക്തമാക്കി.
വേതന കുടിശ്ശിക: 72,000 ദിർഹം
അവധിക്കാല വേതനം: 247,464 ദിർഹം
നോട്ടീസ് വേതനം: 60,000 ദിർഹം
സർവീസ് അവസാനിക്കുന്ന തീയതിക്കുള്ള ഗ്രാറ്റുവിറ്റി: 180,000 ദിർഹം
കമ്മീഷൻ: 110,000 ദിർഹത്തില്‍ കൂടുതലുള്ള പ്രതിമാസ ലാഭത്തിന്റെ 25 ശതമാനം
വൈകിയ പേയ്‌മെന്റ് പലിശ: ഫയല്‍ ചെയ്ത തീയതി മുതല്‍ മുഴുവൻ പേയ്‌മെന്റ് വരെ അഞ്ച് ശതമാനം എന്നിങ്ങനെയായിരുന്നു യുവതിയുടെ ഡിമാൻഡുകള്‍.
യുവതി നല്‍കിയ കേസിന്റെ അടിസ്ഥാനത്തില്‍ ജനുവരിയില്‍ അബുദാബിയിലെ ഫസ്റ്റ് ഇൻസ്റ്റൻസ് കോടതി തൊഴിലുടമയോട് 323,400 ദിർഹം നല്‍കാൻ ഉത്തരവിട്ടു.
ഇതില്‍ വേതന കുടിശ്ശിക, ജോലിയുടെ ഒരു കാലയളവിലെ അവധിക്കാല വേതനം (രണ്ട് വർഷത്തെ പരിധി), സേവനം അവസാനിക്കുന്നതിന്റെ ഗ്രാറ്റുവിറ്റി എന്നിവ ഉള്‍പ്പെട്ടിരുന്നു. എന്നാല്‍ പൂർണ കമ്മീഷൻ, പൂർണ അവധിക്കാല വേതനം എന്നിവയുള്‍പ്പെടെയുള്ള മറ്റ് ക്ലെയിമുകള്‍ നിരസിക്കപ്പെട്ടു.
ഇതിനെതിരെ യുവതി അപ്പീല്‍ നല്‍കിയതിനെത്തുടർന്ന് തൊഴിലുടമ നല്‍കേണ്ട തുക 379,400 ദിർഹമായി അപ്പീല്‍ കോടതി വർദ്ധിപ്പിച്ചു. പിന്നാലെ യുവതി അബുദാബിയിലെ കാസഷൻ കോടതിയെ സമീപിക്കുകയായിരുന്നു.
എന്നാല്‍ കമ്മീഷനുകളെക്കുറിച്ചുള്ള വിദഗ്ദ്ധ റിപ്പോർട്ട് കൃത്യമാണെന്ന് വ്യക്തമാക്കിയ കോടതി യുവതിയുടെ അധിക ക്ലെയിമുകള്‍ നിരസിച്ചു.
അതേ സമയം, അവധിക്കാല വേതനത്തില്‍ ജോലിയുടെ അവസാന രണ്ട് വർഷത്തെ തുക മാത്രമാണ് അനുവദിച്ചിട്ടുള്ളതെന്നും മുഴുവൻ കാലയളവിലെയും അനുവദിച്ചിട്ടില്ലെന്നും കോടതി കണ്ടെത്തി.
യുഎഇ നിയമ പ്രകാരം, ഒരു ജീവനക്കാരന് ഉപയോഗിക്കാത്ത അവധി ദിവസങ്ങള്‍ക്ക് പണം ലഭിക്കാൻ അവകാശമുണ്ടെന്ന് കോടതി വ്യക്തമാക്കി.
ഉപയോഗിക്കാത്ത അവധി ദിവസങ്ങള്‍ എടുക്കുന്നതിന് മുമ്പ് തൊഴിലാളി ജോലി ഉപേക്ഷിച്ചാലും അവധിയുടെ ദൈർഘ്യം കണക്കിലെടുക്കാതെ തന്നെ ഉപയോഗിക്കാത്ത അവധി ദിവസങ്ങള്‍ക്കുള്ള പണം ലഭിക്കാൻ ജീവനക്കാരന് അവകാശമുണ്ടെന്നാണ് കോടതി പറഞ്ഞത്.
വേതന കുടിശ്ശിക, ഗ്രാറ്റുവിറ്റി എന്നിവയുള്‍പ്പെടെയുള്ള ഡിമാൻഡുകളും ശരിവച്ചാണ് 4,34,884 ദിർഹം നല്‍കാൻ കോടതി ഉത്തരവിട്ടത്.
