ദുബായ്: ദുബായിലെ ഇന്ത്യൻ പ്രവാസികള്‍ക്ക് പാസ്പോർട്ട് ഫോട്ടോയിൽ കർശന നിയമങ്ങള്‍ നിലവിൽ വരുന്നു. സെപ്റ്റംബർ ഒന്നു മുതല്‍ ദുബായില്‍ പുതിയ പാസ്പോർട്ടിന് അപേക്ഷിക്കുകയോ പുതുക്കുകയോ ചെയ്യുന്ന ഇന്ത്യൻ പ്രവാസികള്‍ ഫോട്ടോ സംബന്ധിച്ച പുതിയ നിയമങ്ങള്‍ പാലിക്കണം.
ഇന്റർനാഷണല്‍ സിവില്‍ ഏവിയേഷൻ ഓർഗനൈസേഷൻ (ICAO) ഓഗസ്റ്റ് 25-ന് പുറത്തിറക്കിയ മാനദണ്ഡങ്ങള്‍ പാലിക്കുന്ന ഫോട്ടോകള്‍ മാത്രമേ സ്വീകരിക്കുകയുള്ളൂവെന്ന് ദുബായിലെ ഇന്ത്യൻ കോണ്‍സുലേറ്റ് സ്ഥിരീകരിച്ചു.
ഇന്ത്യൻ പാസ്പോർട്ടുകളെ ആഗോള ബയോമെട്രിക് ആവശ്യകതകള്‍ക്ക് അനുസൃതമാക്കുന്നതിന്റെ ഭാഗമായാണിത്.
പാസ്പോർട്ട് സേവാ പോർട്ടല്‍ വഴി ലോകമെമ്പാടുമുള്ള എംബസികള്‍ക്കും കോണ്‍സുലേറ്റുകള്‍ക്കും ഇന്ത്യൻ വിദേശകാര്യ മന്ത്രാലയം നല്‍കിയ നിർദേശത്തെ തുടർന്നാണ് ഈ തീരുമാനം.
അപേക്ഷകർ അറിഞ്ഞിരിക്കേണ്ട കാര്യങ്ങള്‍
ഈ മാറ്റത്തിലൂടെ, മിക്ക അപേക്ഷകരും പുതുക്കിയ മാനദണ്ഡങ്ങള്‍ക്കനുസരിച്ചുള്ള പുതിയ ഫോട്ടോകള്‍ സമർപ്പിക്കേണ്ടി വരും.
മുൻപ് ചില ഇളവുകള്‍ അനുവദിച്ചിരുന്നുവെങ്കിലും, പാസ്പോർട്ടുകള്‍ മെഷീൻ റീഡബിള്‍ ആണെന്നും ആഗോളതലത്തില്‍ സ്വീകാര്യമാണെന്നും ഉറപ്പാക്കാൻ ICAO മാനദണ്ഡങ്ങള്‍ കർശനമായി പാലിക്കാൻ പുതിയ നിയമങ്ങള്‍ ആവശ്യപ്പെടുന്നു.
ഫോട്ടോയുടെ പുതുക്കിയ മാനദണ്ഡങ്ങള്‍
ഫോർമാറ്റ്: വെളുത്ത പശ്ചാത്തലത്തിലുള്ള കളർ ഫോട്ടോ, വലുപ്പം 630 x 810 പിക്സല്‍ (പ്രിന്റ് ചെയ്യുകയാണെങ്കില്‍ 2x2 ഇഞ്ച്).
ഫ്രെയിമിങ്: തലയും തോളുകളും വ്യക്തമാകുന്ന ക്ലോസപ്പ് ചിത്രം, മുഖം ഫ്രെയിമിന്റെ 80-85 ശതമാനം വരെ വരണം.
വ്യക്തത: ഫില്‍ട്ടറുകള്‍, കമ്പ്യൂട്ടർ എഡിറ്റുകള്‍, മങ്ങല്‍ എന്നിവ പാടില്ല. സ്വാഭാവിക നിറം ദൃശ്യമായിരിക്കണം.
ലൈറ്റിങ്: എല്ലായിടത്തും ഒരുപോലെ വെളിച്ചം വേണം, നിഴലുകള്‍, പ്രകാശത്തിന്റെ പ്രതിഫലനം, റെഡ്-ഐ (കുറഞ്ഞ വെളിച്ചത്തിലോ രാത്രിയിലോ ഫോട്ടോഗ്രാഫിക് ഫ്ലാഷ് ഉപയോഗിക്കുമ്പോള്‍ കണ്ണുകളില്‍ സംഭവിക്കുന്നത്) എന്നിവ ഉണ്ടാകരുത്.
മുഖഭാവം: കണ്ണുകള്‍ തുറന്നും വായ അടച്ചുമിരിക്കണം, മുടി കണ്ണിനെ മറയ്ക്കരുത്, മുഖം നേരെയും മധ്യഭാഗത്തായുമായിരിക്കണം.
കണ്ണടകളും ശിരോ വസ്ത്രവും: കണ്ണടകള്‍ ഒഴിവാക്കണം. മതപരമായ കാരണങ്ങളാല്‍ ശിരോ വസ്ത്രം ധരിക്കാമെങ്കിലും മുഖം പൂർണമായി കാണണം.
ഭാവം: നിർവികാരവും സ്വാഭാവികവുമായ ഭാവം.
ക്യാമറ ദൂരം: 1.5 മീറ്റർ ദൂരെ നിന്ന് എടുത്തതായിരിക്കണം.
എന്തുകൊണ്ടാണ് ഈ മാറ്റം
ICAO മാനദണ്ഡങ്ങള്‍ പാലിക്കുന്ന ചിത്രങ്ങളിലേക്കുള്ള ഈ മാറ്റം ഇന്ത്യൻ പാസ്പോർട്ടുകളുടെ സുരക്ഷ വർധിപ്പിക്കാനും ലോകമെമ്പാടുമുള്ള ഇമിഗ്രേഷൻ കൗണ്ടറുകളില്‍ അവയ്ക്ക് കൂടുതല്‍ സ്വീകാര്യത നല്‍കാനും ലക്ഷ്യമിടുന്നു.
കുവൈറ്റിലേത് ഉള്‍പ്പെടെയുള്ള മറ്റ് ഇന്ത്യൻ നയതന്ത്ര കാര്യാലയങ്ങള്‍ ഇതിനകം സമാനമായ നിബന്ധനകള്‍ നടപ്പിലാക്കി കഴിഞ്ഞിട്ടുണ്ട്. അബുദാബിയിലും ഇത് ഉടൻ നടപ്പിലാക്കുമെന്നാണ് പ്രതീക്ഷ.
അപേക്ഷ വൈകുന്നതും നിരസിക്കുന്നതും ഒഴിവാക്കാൻ ദുബായിലെ അപേക്ഷകർ അപ്പോയിന്റ്മെൻ്റ് എടുക്കുന്നതിന് മുൻപ് പുതുക്കിയ നിയമങ്ങള്‍ ശ്രദ്ധാപൂർവം പരിശോധിക്കാൻ പ്രത്യേകം നിർദേശിക്കുന്നുണ്ട്.
പ്രവാസികളെ സംബന്ധിച്ചിടത്തോളം പുതിയ നിബന്ധനകള്‍ അനുസരിച്ചുള്ള ഫോട്ടോ എടുക്കുക എന്നത് ഒരു അധിക നടപടിക്രമം മാത്രമാവും. എന്നാല്‍ ഇത് സുഗമമായ യാത്രയും അന്താരാഷ്ട്ര അതിർത്തികളിലെ തടസ്സങ്ങള്‍ കുറയ്ക്കുകയും ചെയ്യും.
