വാഷിംഗ്ടൺ/ന്യൂഡൽഹി: പശ്ചിമേഷ്യയിൽ യുദ്ധഭീതി വർദ്ധിപ്പിച്ചുകൊണ്ട്, ഇന്ത്യയിലേക്ക് തിരിക്കാനിരുന്ന ഇറാന്റെ ചരക്ക് വിമാനം അമേരിക്ക തകർത്തു. ഇറാനിലെ മഷദ് അന്താരാഷ്ട്ര വിമാനത്താവളത്തിൽ പാർക്ക് ചെയ്തിരുന്ന മഹൻ എയർ വിമാനത്തിന് നേരെയാണ് ആക്രമണമുണ്ടായത്. മാനുഷിക സഹായങ്ങൾ ശേഖരിക്കുന്നതിനായി നാളെ പുലർച്ചെ നാല് മണിക്ക് ഡൽഹിയിൽ എത്തേണ്ടിയിരുന്ന വിമാനമാണിത്.
മരുന്നുകളും മറ്റ് മെഡിക്കൽ സാമഗ്രികളും ഇന്ത്യയിൽ നിന്നും ഇറാനിലേക്ക് എത്തിക്കുന്നതിനായാണ് വിമാനം നിയോഗിച്ചിരുന്നത്. ഈ മാസം 18-ന് ഇന്ത്യയിൽ നിന്നുള്ള ആദ്യഘട്ട സഹായം ഇറാനിൽ എത്തിച്ചിരുന്നു. ഇതിന്റെ തുടർച്ചയായാണ് രണ്ടാമത്തെ വിമാനം പുറപ്പെടാനിരുന്നത്. സംഭവത്തിൽ അമേരിക്ക ഇതുവരെ ഔദ്യോഗികമായി പ്രതികരിച്ചിട്ടില്ല.
അന്താരാഷ്ട്ര നിയമങ്ങളുടെ ലംഘനമെന്ന് ഇറാൻ
അമേരിക്കയുടെ ഈ നടപടി അന്താരാഷ്ട്ര നിയമങ്ങളുടെ നഗ്നമായ ലംഘനമാണെന്ന് ഇന്ത്യയിലെ ഇറാൻ സ്ഥാനപതി കാര്യാലയം അറിയിച്ചു. നിഷ്പക്ഷമായ അന്താരാഷ്ട്ര അന്വേഷണം വേണമെന്ന് ഇറാന്റെ സിവിൽ ഏവിയേഷൻ ഓർഗനൈസേഷൻ ആവശ്യപ്പെട്ടു. മാനുഷിക പരിഗണന പോലുമില്ലാതെയാണ് അമേരിക്ക വിമാനം തകർത്തതെന്നാണ് ഉയരുന്ന ആരോപണം.
യുദ്ധച്ചെലവ് അറബ് രാജ്യങ്ങൾ നൽകണം: ട്രംപ്
ഇറാനുമായുള്ള സൈനിക നീക്കങ്ങളുടെ സാമ്പത്തിക ബാധ്യത പശ്ചിമേഷ്യയിലെ അറബ് രാജ്യങ്ങൾ പങ്കിടണമെന്ന നിലപാടിലാണ് അമേരിക്കൻ പ്രസിഡന്റ് ഡോണൾഡ് ട്രംപ്. യുദ്ധത്തിന്റെ ചെലവ് അറബ് രാജ്യങ്ങളിൽ നിന്ന് ഈടാക്കാൻ ട്രംപ് ആഗ്രഹിക്കുന്നതായി വൈറ്റ് ഹൗസ് വക്താവ് കരോലിൻ ലെവിറ്റ് വ്യക്തമാക്കി. ഈ ആവശ്യം വരുംദിവസങ്ങളിൽ മേഖലയിലെ നയതന്ത്ര ബന്ധങ്ങളിൽ കൂടുതൽ വിള്ളലുണ്ടാക്കാൻ സാധ്യതയുണ്ട്.
മേഖലയുടെ സുരക്ഷയ്ക്കായി നടത്തുന്ന സൈനിക നീക്കങ്ങളുടെ സാമ്പത്തിക ഭാരം അമേരിക്ക ഒറ്റയ്ക്ക് വഹിക്കേണ്ടതില്ലെന്നതാണ് പ്രസിഡന്റിന്റെ നിലപാട്." - കരോലിൻ ലെവിറ്റ് (വൈറ്റ് ഹൗസ് വക്താവ്)
