റാസ് അൽ ഖൈമ പബ്ലിക് സർവീസസ് ഡിപ്പാർട്ട്മെന്റിന്റെ പരിസ്ഥിതി നിരീക്ഷണ വിഭാഗമായ റാഖിബ് ഈ വർഷം ജനുവരി മുതൽ എമിറേറ്റിലുടനീളം നടത്തിയ പരിശോധനകളിൽ 1,594 പരിസ്ഥിതി നിയമലംഘനങ്ങൾ കണ്ടെത്തി. വരാനിരിക്കുന്ന ഈദുൽ അസ്ഹ അവധിക്കാലത്ത് ബീച്ചുകളിലും പാർക്കുകളിലും മറ്റ് പ്രകൃതിദത്ത വിനോദസഞ്ചാര കേന്ദ്രങ്ങളിലും സന്ദർശകരുടെ വൻ തിരക്ക് പ്രതീക്ഷിക്കുന്നതിനാൽ, പൊതുജനങ്ങൾ പരിസ്ഥിതി മാനദണ്ഡങ്ങൾ കർശനമായി പാലിക്കണമെന്ന് അധികൃതർ ആവശ്യപ്പെട്ടു.
എമിറേറ്റിലെ പ്രകൃതിഭംഗി നിലനിർത്തുന്നതിനും പരിസ്ഥിതി സംരക്ഷണം ഉറപ്പാക്കുന്നതിനുമായി ഇൻസ്പെക്ഷൻ ടീമുകൾ വിട്ടുവീഴ്ചയില്ലാത്ത പരിശോധനകളാണ് നടത്തിവരുന്നത്. മുൻകൂട്ടി നിശ്ചയിച്ച ഇടങ്ങളിലല്ലാതെ തറയിൽ നേരിട്ട് തീയിടുകയോ ബാർബിക്യു ചെയ്യുകയോ ചെയ്യുക, പൊതുസ്ഥലങ്ങളിൽ മാലിന്യങ്ങൾ വലിച്ചെറിയുക, തീരദേശ മരുഭൂമി മേഖലകളിലെ പ്രകൃതിക്ക് നാശമുണ്ടാക്കുക എന്നിവയാണ് പ്രധാനമായും കണ്ടെത്തിയ ലംഘനങ്ങളെന്ന് പബ്ലിക് സർവീസസ് ഡിപ്പാർട്ട്മെന്റ് ഡയറക്ടർ ജനറൽ ഖാലിദ് ഫദ്ൽ അൽ അലി വ്യക്തമാക്കി.
അതോറിറ്റി പുറത്തുവിട്ട കൃത്യമായ കണക്കുകൾ പ്രകാരം, അനുമതിയില്ലാത്ത സ്ഥലങ്ങളിൽ നിയമവിരുദ്ധമായി തീയിട്ടതിനും ബാർബിക്യു ചെയ്തതിനുമായി 535 കേസുകളാണ് രജിസ്റ്റർ ചെയ്തത്. പൊതുസ്ഥലങ്ങളിൽ തുപ്പിയതിനും വ്യക്തിഗത അവശിഷ്ടങ്ങൾ ശരിയായി സംസ്കരിക്കാത്തതിനും 221 കേസുകളും, മറ്റ് രീതികളിൽ പൊതുവിടങ്ങളിൽ മാലിന്യം തള്ളിയതിന് 210 കേസുകളും ഇതിൽ ഉൾപ്പെടുന്നു.
പൊതുജന പങ്കാളിത്തത്തോടെയുള്ള പരിസ്ഥിതി സംരക്ഷണം കൂടുതൽ ശക്തമാക്കാൻ റാഖിബ് സേവനത്തിലൂടെ സാധിക്കുന്നുണ്ട്. പരിസ്ഥിതിയും പ്രകൃതിദത്ത വിഭവങ്ങളും സംരക്ഷിക്കുക എന്നത് സമൂഹത്തിലെ ഓരോ അംഗത്തിന്റെയും കൂട്ടായ ഉത്തരവാദിത്തമാണെന്നും നിയമലംഘകർക്കെതിരെ കർശന നടപടികൾ തുടരുമെന്നും വകുപ്പ് ഓർമ്മിപ്പിച്ചു.
