വാഷിംഗ്ടൺ/ടെഹ്റാൻ: പശ്ചിമേഷ്യയിൽ വീണ്ടും ആഭ്യന്തര-സൈനിക സംഘർഷം രൂക്ഷമാകുന്നു. ഒമാൻ ഉൾക്കടലിൽ നാല് എണ്ണക്കപ്പലുകളും ഖാർഗ് ദ്വീപിന് സമീപം ഒരു എണ്ണക്കപ്പലും ഉൾപ്പെടെ ഇറാന്റെ അഞ്ച് പ്രമുഖ എണ്ണക്കപ്പലുകൾ തകർത്തതായി യു.എസ് സെൻട്രൽ കമാൻഡ് (സെന്റ്കോം) അറിയിച്ചു. ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (ഐ.ആർ.ജി.സി) അമേരിക്കൻ പടക്കപ്പലിന് നേരെ ആക്രമണം നടത്താൻ ശ്രമിച്ചതിനുള്ള പ്രത്യാക്രമണമാണ് ഇതെന്ന് യു.എസ് വ്യക്തമാക്കി.
അമേരിക്കൻ ആക്രമണത്തിന് പിന്നാലെ, ജോർദാനിലെ യു.എസ് സൈനിക താവളത്തിന് നേരെ ഐ.ആർ.ജി.സി പ്രത്യാക്രമണം നടത്തി. കുവൈറ്റ്, ബഹ്റൈൻ തുറമുഖങ്ങൾക്ക് സമീപമുള്ള എണ്ണ ടാങ്കറുകൾ ആക്രമിക്കപ്പെടുമെന്ന് മുന്നറിയിപ്പ് നൽകിയ ഇറാൻ, പ്രദേശത്തെ കപ്പലുകളിൽ നിന്ന് ജീവനക്കാരെ അടിയന്തരമായി ഒഴിപ്പിക്കാനും ആവശ്യപ്പെട്ടു.
അതിനിടെ, ഇറാന്റെ വ്യോമയാന മേഖലയ്ക്ക് സഹായം നൽകുന്ന 36 വ്യക്തികൾക്കും സ്ഥാപനങ്ങൾക്കുമെതിരെ യു.എസ് ട്രഷറി വകുപ്പ് ശക്തമായ ഉപരോധം പ്രഖ്യാപിച്ചു. മറ്റൊരു സംഭവവികാസത്തിൽ, യെമനിൽ ഹൂതി വിമതർക്കെതിരെ ഔദ്യോഗിക സർക്കാറിന്റെ പ്രത്യാക്രമണം ശക്തമായി തുടരുകയാണ്. തലസ്ഥാനമായ സന ഹൂതികളിൽ നിന്നും തിരിച്ചുപിടിക്കുകയാണ് ലക്ഷ്യമെന്ന് സർക്കാർ പ്രഖ്യാപിച്ചു.
വെസ്റ്റ് ബാങ്കിലെ അനധികൃത ഇസ്രായേലി കുടിയേറ്റ കേന്ദ്രങ്ങളിൽ ഉൽപ്പാദിപ്പിക്കുന്ന സാധനങ്ങളുടെ നിരോധനത്തിൽ ഫ്രാൻസും കാനഡയും പങ്കുചേരുമെന്ന് ബ്രിട്ടൻ അറിയിച്ചു. ഇതോടെ ഇസ്രായേൽ കുടിയേറ്റ പ്രദേശങ്ങളിൽ നിന്നുള്ള വസ്തുക്കൾ നിരോധിച്ച രാജ്യങ്ങളുടെ എണ്ണം പന്ത്രണ്ടായി ഉയർന്നു.
