ദുബായില്‍ പ്രവാസികള്‍ക്കും സ്വന്തമായൊരു വീട്, ആ സ്വപ്നം ഇനി വിദൂരമല്ല; "ഫസ്റ്റ് ടൈം ഹോം ബയർ പ്രോഗ്രാം" വിപുലീകരിച്ചു

ദുബായ്: ജീവിതത്തിന്‍റെ ഏറിയ പങ്കും ഗള്‍ഫ് രാജ്യങ്ങളില്‍ ചെലവഴിക്കുന്ന സാധാരണക്കാരായ പ്രവാസികള്‍ക്ക് തങ്ങളുടെ പോറ്റമ്മയായ നാട്ടില്‍ സ്വന്തമായി ഒരുതരി മണ്ണെന്ന സ്വപ്നം സാക്ഷാത്കരിക്കാൻ അവസരം.

ദുബായില്‍ ആദ്യമായി വീട് വാങ്ങാൻ ആഗ്രഹിക്കുന്ന താമസക്കാർക്കായി ദുബായ് ലാൻഡ് ഡിപ്പാർട്ട്‌മെന്‍റും ഡിപ്പാർട്ട്‌മെന്‍റ് ഓഫ് ഇക്കണോമി ആൻഡ് ടൂറിസവും ചേർന്ന് നടപ്പിലാക്കുന്ന 'ഫസ്റ്റ് ടൈം ഹോം ബയർ പ്രോഗ്രാം' കൂടുതല്‍ ആനുകൂല്യങ്ങളോടെ വിപുലീകരിച്ചു. 

2025 ജൂലൈയില്‍ ആരംഭിച്ച ഈ പദ്ധതിയിലൂടെ ഇതിനകം തന്നെ 3,200-ലധികം ആളുകള്‍ സ്വന്തം വീട് വാങ്ങിക്കഴിഞ്ഞു. 500 കോടിയിലധികം ദിർഹത്തിന്‍റെ ഇടപാടുകളാണ് ഈ പദ്ധതി വഴി ഇതുവരെ നടന്നത്.

ആർക്കൊക്കെ അപേക്ഷിക്കാം?

ഏത് രാജ്യക്കാരായ പ്രവാസികള്‍ക്കും സ്വദേശികള്‍ക്കും ഈ പദ്ധതിയുടെ ഭാഗമാകാം. അപേക്ഷകർ 18 വയസ്സോ അതില്‍ കൂടുതലോ പ്രായമുള്ളവരായിരിക്കണം. ദുബായില്‍ സ്വന്തമായി മറ്റ് ഫ്രീഹോള്‍ഡ് പ്രോപ്പർട്ടികള്‍ ഉണ്ടാകരുത്. വാങ്ങാൻ ഉദ്ദേശിക്കുന്ന വീടിന്‍റെ മൂല്യം 50 ലക്ഷം ദിർഹം വരെ ആയിരിക്കണം.

ദുബായ് ലാൻഡ് ഡിപ്പാർട്ട്‌മെന്‍റിന്‍റെ വെബ്‌സൈറ്റ് വഴിയോ 'ദുബായ് റെസ്റ്റ്' ആപ്പ് വഴിയോ അപേക്ഷിക്കാം. യോഗ്യരായവർക്ക് ലഭിക്കുന്ന ക്യുആർ കോഡ് ഉപയോഗിച്ച്‌ ഡെവലപ്പർമാരില്‍ നിന്നും ബാങ്കുകളില്‍ നിന്നും ആനുകൂല്യങ്ങള്‍ കൈപ്പറ്റാം.

ആദ്യമായി വീട് വാങ്ങുന്നവർക്കുള്ള പ്രധാന ആകർഷണങ്ങള്‍

പുതിയ പ്രോജക്ടുകളില്‍ മുൻഗണന: പുതിയ ഫ്ലാറ്റുകളോ വില്ലകളോ വിപണിയില്‍ എത്തുന്നതിന് മുൻപ് തന്നെ രജിസ്റ്റർ ചെയ്ത ഉപഭോക്താക്കള്‍ക്ക് അത് കാണാനും തിരഞ്ഞെടുക്കാനുമുള്ള മുൻഗണന ലഭിക്കും.

പ്രത്യേക വിലക്കിഴിവ്: പദ്ധതിയില്‍ പങ്കാളികളായ നിർമ്മാതാക്കള്‍ ആദ്യമായി വീട് വാങ്ങുന്നവർക്ക് പ്രത്യേക വിലക്കിഴിവുകള്‍ നല്‍കും.

ആകർഷകമായ ഹോം ലോണ്‍ വ്യവസ്ഥകള്‍: അഞ്ച് പ്രമുഖ ബാങ്കുകളാണ് ഈ പദ്ധതിയുമായി സഹകരിക്കുന്നത്. കുറഞ്ഞ പലിശ നിരക്ക്, കുറഞ്ഞ ബാങ്ക് ഫീസ്, വേഗത്തിലുള്ള ലോണ്‍ അനുമതി എന്നിവ ഇതിലൂടെ ഉറപ്പാക്കാം.

കുറഞ്ഞ പ്രാരംഭ ചിലവുകള്‍: ലാൻഡ് ഡിപ്പാർട്ട്‌മെന്റ് രജിസ്‌ട്രേഷൻ ഫീസുകള്‍ നിശ്ചിത ക്രെഡിറ്റ് കാർഡുകള്‍ വഴി പലിശയില്ലാത്ത പ്രതിമാസ തവണകളായി അടയ്ക്കാനുള്ള സൗകര്യമുണ്ട്.

ഫ്ലെക്സിബിള്‍ പേയ്‌മെന്‍റ് പ്ലാനുകള്‍: നിർമ്മാണത്തിലിരിക്കുന്ന പ്രോപ്പർട്ടികള്‍ വാങ്ങുമ്പോള്‍ തുക ദീർഘകാലയളവിലേക്ക് വിഭജിച്ച്‌ നല്‍കാനുള്ള ഫ്ലെക്സിബിള്‍ പേയ്‌മെന്റ് പ്ലാനുകള്‍ ലഭ്യമാണ്.

കൂടുതല്‍ ചോയ്‌സുകളുമായി പുതിയ ഡെവലപ്പർമാർ

പദ്ധതിയുടെ പുതിയ വിപുലീകരണത്തിന്‍റെ ഭാഗമായി ഒൻപത് പുതിയ പ്രമുഖ റിയല്‍ എസ്റ്റേറ്റ് ഡെവലപ്പർമാരെക്കൂടി ഉള്‍പ്പെടുത്തിയിട്ടുണ്ട്. 

ഇതോടെ ആകെ പങ്കാളികളായ ഡെവലപ്പർമാരുടെ എണ്ണം 22 ആയി ഉയർന്നു. സമന, റപ്പോർട്ടേജ് , അരാദ തുടങ്ങിയ പ്രമുഖ കമ്പനികള്‍ ഇതില്‍ ഉള്‍പ്പെടുന്നു. ഇത് വഴി വ്യത്യസ്ത ബഡ്ജറ്റുകളിലും ലൊക്കേഷനുകളിലും വീടുകള്‍ തിരഞ്ഞെടുക്കാൻ വായനക്കാർക്ക് സാധിക്കും.

വർഷങ്ങളായി ദുബായില്‍ വാടകയ്ക്ക് താമസിക്കുന്ന പ്രവാസികള്‍ക്ക്, വാടക തുകയ്ക്ക് തുല്യമായ തവണകളില്‍ സ്വന്തമായി ഒരു വീട് എന്ന സ്വപ്നം യാഥാർത്ഥ്യമാക്കാൻ ഈ സർക്കാർ പദ്ധതി മികച്ചൊരു ചവിട്ടുപടിയാണ്.