ന്യൂഡൽഹി: ആറ് വർഷത്തെ ഇടവേളയ്ക്ക് ശേഷം ചൈനയിലെ പ്രധാന വ്യാവസായിക നഗരമായ ഗ്വാങ്ഷൂവിൽ (Guangzhou) നിന്ന് ഡൽഹിയിലേക്ക് നേരിട്ടുള്ള വിമാന സർവീസുകൾ ചൈന സതേൺ എയർലൈൻസ് പുനരാരംഭിക്കുന്നു. ഈ മാസം 21 മുതൽ സർവീസുകൾ ഔദ്യോഗികമായി ആരംഭിക്കുമെന്ന് കമ്പനി അറിയിച്ചു. ചൈനീസ് പ്രസിഡന്റ് ഷി ജിൻപിങ് ഉച്ചകോടിക്കായി ഇന്ത്യയിലെത്തിയതിന് തൊട്ടുപിന്നാലെയാണ് ഈ പ്രഖ്യാപനം പുറത്തുവന്നത്.
ഇതോടെ ദക്ഷിണേഷ്യയിലെ വിവിധ രാജ്യങ്ങളിലായി കമ്പനിയുടെ പ്രതിവാര സർവീസുകളുടെ എണ്ണം നൂറിലധികമായി ഉയരും. കോവിഡ് വ്യാപനത്തെ തുടർന്നും അതിർത്തിയിലുണ്ടായ ഗാൽവാൻ തർക്കങ്ങളെ തുടർന്നും നിർത്തിവെച്ചിരുന്ന വ്യോമഗതാഗത ബന്ധം 2026-ഓടെ രണ്ട് രാജ്യങ്ങളും ഘട്ടംഘട്ടമായി പുനഃസ്ഥാപിച്ച് വരികയായിരുന്നു.
നേരത്തെ എയർ ചൈന ഏപ്രിലിൽ ബീജിംഗ്–ഡൽഹി സർവീസും, ചൈന ഈസ്റ്റേൺ എയർലൈൻസ് ഏപ്രിൽ 18-ന് കുൻമിംഗ്–കൊൽക്കത്ത സർവീസും പുനരാരംഭിച്ചിരുന്നു. ഇന്ത്യൻ വിമാനക്കമ്പനിയായ ഇൻഡിഗോയും സർവീസുകൾ നടത്തുന്നുണ്ട്. പുതിയ വിമാന സർവീസ് കൂടി എത്തുന്നതോടെ ഇരുരാജ്യങ്ങളും തമ്മിലുള്ള വ്യാപാര, നയതന്ത്ര ബന്ധങ്ങൾക്ക് കൂടുതൽ വേഗത കൈവരുമെന്നാണ് പ്രതീക്ഷിക്കുന്നത്.
